'నేను' వదిలి రా.. నేను కనబడతాను..! Motivational Speech

 

'నేను' వదిలి రా.. నేను కనబడతాను..!

మనిషికి జయాపజయాలతో సంబంధం లేకుండా, మొదలుపెట్టిన పనిని పూర్తిచెయ్యాలన్నది, ఆర్యోక్తి. ఆశావహ దృక్పథాన్ని పెంపొందించే సూత్రమది. జీవిత గమనంలో, మనిషి ఎన్నో కార్యాలను తలపెడతాడు. పనులన్నీ సఫలం కావాలని ఆశించకపోయినా, కొన్ని విజయాలనైనా రుచి చూడాలన్న కోరిక, ప్రతి మనిషికీ ఉంటుంది. ఏకాగ్రత, స్థిరచిత్తం, పనులను సఫలం చేస్తాయి. ఆధ్యాత్మికత, ఆ రెండింటినీ, మనిషి వశం చేస్తుంది. ఆ వివరాలు తెలుసుకోవడానికి, ఈ రోజుటి మన వీడియోను పూర్తిగా చూసి, మీ అభిప్రాయాన్ని తెలియజేస్తారని కోరుకుంటున్నాను..

[ ఈ వ్యాసాన్ని వీడియోగా చూడండి: https://youtu.be/0YFcLtZ565o ]

ప్రతి వ్యక్తికీ, ఒక్కొక్కసారి కార్యం పూర్తయినట్లే అనిపిస్తుంది. విజయం మన ముంగిట నిలిచినట్లే తోస్తుంది. అంతలోనే, అపజయం ఎదురవుతుంది. పరాజయానికి, సమర్థతాలేమి కన్నా, సరైన ప్రణాళిక లేకపోవడమే, ఎక్కువ కారణమవుతుంది. అర్జునుడు పక్షి కనుగుడ్డుకు గురిపెట్టినప్పుడూ, మత్స్యయంత్రం ఛేదనకు పూనుకున్నప్పుడూ, అతడి విజయానికి కారణమయ్యింది, ప్రతిభ మాత్రమే కాదు.. రెప్పపాటు నిడివి సైతం తేడాలేకుండా, బాణాన్ని వెయ్యాలన్న సమయానుకూలమైన నిర్ణయం.

మనస్సు పరిపరి విధాలైన ఆలోచనల్ని చేస్తుంది. ఏ ఒక్క ఆలోచనా, కడవరకూ సాగదు. ఉద్రేకపూరిత భావనలు, మనస్సును అల్లకల్లోలం చేస్తాయి. అస్థిరమైన మనస్సు, కార్యసాధనకు ఆటంకమవుతుంది. మనస్సును వశం చేసుకున్నవాడు, విశ్వవిజేత అవుతాడని, బుద్ధుడి మాట. విశ్వామిత్రుడు మనోస్థిరత్వాన్ని సాధించలేకపోయాడు. మేనకాధీనుడై, చిరకాలం దీనుడిగా మిగిలిపోయాడు. ఊర్వశిని త్యజించిన అర్జునుడు, మనస్సుపై విజయం సాధించాడు. విజయుడిగా స్థిరపడ్డాడు. కార్య సఫలతకు కృషి చేసే సాధకుడు, మనో నిబ్బరాన్ని అలవరచుకోవాలి. సమయానుకూలంగా మనస్సును అధీనంలోకి తెచ్చుకోవడం కోసం, ధ్యాన సాధన చేయాలి.

అహంకారం, అవరోధాలకు కారణమవుతుంది. లక్ష్యసాధనకోసం పురోగమించే వ్యక్తి, అహంకార రహితుడు కావాలి. అధికారం, అహంకారం, మమకారం, మత్తు కన్నా ప్రమాదకరమైనవి. ‘నేను వదిలి రా, నేను కనబడతాను’ అంటాడు, భగవంతుడు భక్తుడితో.. తీవ్రమైన ఆటంకాల వరద ముంచెత్తుతున్నప్పుడు, మహావృక్షంలా, అహంకరించినవాడు, కూకటి వేళ్లతో సహా కూలిపోతాడు. సమయానుకూలంగా, గడ్డిపోచల మాదిరిగా తలదించుకు నిలచిన వ్యక్తి, ఆపదల నుంచి గట్టెక్కుతాడు. కఠినమైన టెంకాయను గుడిలో పగలగొట్టడం, అహంకార నిర్మూలన చేయమన్న భక్తుడి వేడికోలుకు, ప్రతీక..

మనిషి తన జీవిత కాలంలో, గొప్ప కార్యాలెన్నో తలపెడతాడు. విజయం వరించినా, లేకపోయినా, పరాజయం మాత్రం, కచ్చితంగా నిర్ధారితమై ఉంటుంది. ఓటములకు లోనై, అలసట చెందిన మనిషి, అంతర్గతంగా మనస్సు చెప్పే మాటలను ఆలకించాలి. పరాజయాలకు కారణాలను విశ్లేషించుకోవాలి. సమయానుకూలమైన నిర్ణయాలను, స్వాగతించాలి. నరికిన మోడు నుంచి, చిగురించిన పచ్చని మొక్కలా, తనను తాను మలుచుకోవాలి.

సాధకుడి విజయాలకు పరమార్థం, వ్యక్తిగత ప్రగతి మాత్రమే కాదు. సమాజ పురోగతి సైతం, అందులో అంతర్లీనమై ఉంటుంది. సమాజ సహకారం, తోడ్పాటూ లేనిదే, ఏ వ్యక్తీ ఉన్నతుడిగా ఎదగలేడు. లక్ష్య సాధన చేసిన వ్యక్తి, విజయ శిఖరాలను అందుకున్న తరుణంలో, విశాల దృక్పథాన్ని ప్రదర్శించాలి. పంచభూతాలూ, విశ్వమంతా ఆవరించిన ప్రకృతీ నేర్పే విలువైన పాఠం, మనిషిని విశాలదృక్పథుడిగా మార్చడమే..

ఇందుకు సరైన ఉదాహరణ, ‘భూమి అట్టడుగు పొరల్లో పడి ఉన్న నన్ను, ఇంత ఎత్తుకు పెంచిన రైతుకు ఏమివ్వగలను? సమయానుకూలతను బట్టి, ధాన్యరూపంలో నన్ను నేను అర్పించుకోవడం తప్ప..’ అనుకుని, పంటసిరి మురిసిపోతుంది!

కృష్ణం వందే జగద్గురుం!

Link: https://www.youtube.com/post/UgkxZjn9hR_mMSMi19JND9MoEbT-r_WjXMC4

'ప్రార్థన' - భగవంతుడితో సంభాషణ! How to Talk to God

 

'ప్రార్థన' - భగవంతుడితో సంభాషణ!

మనిషి ఈ ప్రపంచంలో సుఖంగా ఉండాలనుకోవడం, అందుకు తగ్గ వెసులుబాటుకోసం ప్రయత్నించడం, సహజం. ధనం ధర్మంగా సంపాదించుకోవచ్చు. ధర్మబద్ధమైన కోరికలు తీర్చుకోవచ్చు. అంతులేని కోరికలు, గుర్రాల్లా పరుగులు తీస్తూనే ఉంటాయి. ధనం, ఇంధనంలా దహించుకుపోతూంటుంది. జీవితంలో ఈ విషయం, ప్రతి మనిషికీ, ఏదో ఒక రోజు తప్పనిసరిగా అర్థం అవుతుంది.

[ ఈ వ్యాసాన్ని వీడియోగా చూడండి: https://youtu.be/dtTEMWXYWHs ]

అప్పుడు.. ఈ భౌతికమైన సుఖాలు కేవలం తాత్కాలికమేనన్న జ్ఞానం కలుగుతుంది. వీటికి మించిన శాశ్వతానందం ఎక్కడుందన్న జిజ్ఞాస, ఆ సమయంలో మొదలవుతుంది. గుండెలోతుల్లో నుంచి, గంగాజలంలా పైకి లేచిన ఆ ఆకాంక్ష, ఒక ఆర్తనాదమై, ఒక ఆవేదనా రూపమై, చెలరేగుతుంది. అదే 'ప్రార్థన!'. పూర్తి వివరణ తెలుసుకోవడానికి, ఈ వీడియోను చివరిదాకా చూడండి..

మన హృదయాన్ని దైవం ముందు ఆవిష్కరించుకోవడాన్ని, ప్రార్థన అన్నారు. అది ఏ గ్రంథం లోనిదైనా కావచ్చు. శ్లోకం కావచ్చు, పద్యం గానీ, పాట గానీ కావచ్చు. మాటలే లేని మౌన ధ్యానమూ కావచ్చు. భగవంతుడితో భక్తుడు జరిపే సంభాషణ, ప్రార్థన. ప్రార్థన మనిషి జీవితంలో, ఆలోచనల్లో భాగం. ప్రార్థన మన శ్వాస వంటిదే. కవులు తమ కావ్యారంభంలో, ఇష్టదేవతా ప్రార్థన చేస్తారు. తమ కావ్యాలకు యశస్సూ, పండితాదరణా కావాలని కోరుకుంటారు. కావ్యావతారికల్లో ఇష్టదైవాన్ని, తమ ప్రభువులకు విజయ పరంపర కలిగించమని ప్రార్థిస్తారు. రాజాశ్రయం కోరని పోతన, 'శ్రీ కైవల్య పదంబు చేరుటకునై చింతించెదన్‌' అని అన్నాడు. అంటే, మోక్షం కోసం రాస్తున్నానని, విన్నవించుకున్నాడు. భక్త రామదాసు కీర్తనల్లో, ఆర్తి, ప్రేమ, కోరిక కనిపిస్తాయి. వీటిలోంచి విన్నపం పుడుతుంది. అదీ ప్రార్థనే. అధికారికి విన్నవించుకునేటప్పుడు, అతడి విశ్రాంతి సమయం చూసుకుని, మనోభావం, చిత్తవృత్తీ గ్రహించి మరీ వ్యవహరిస్తారు. అలాగే భగవంతుడికీ షోడశోపచారాలు చేసి, కొంతసేపు కీర్తిస్తారు. నీ సేవకుడినంటూ దాసోహం చేస్తారు.

కష్టాల్లో ఉన్నప్పుడూ, సమస్యలు ఉక్కిరిబిక్కిరి చేస్తున్నప్పుడూ, కొందరికి భగవంతుడు గుర్తుకు వస్తాడు. అప్పుడు కష్టాలు తొలగించమని, ప్రార్థిస్తారు. మొసలి వల్ల తన ప్రాణం పోవడం నిశ్చయం అనుకున్న గజేంద్రుడు, 'నా బలం నశించిపోతోంది. ధైర్యం తరిగిపోయింది. ప్రాణాలు పోతున్నాయి. వచ్చి రక్షించు!' అని శ్రీహరిని ప్రార్థించాడు. నిత్య జీవితంలో సంకటాలు ఎదురైనప్పుడూ, కోరికలు నెరవేరనప్పుడూ, ఏదైనా ఆశించినప్పుడూ, దైవాన్ని ప్రార్థించడం పరిపాటి. కానీ, ప్రార్థనను జీవితంలో భాగంగా చేసుకోవాలి.

రామకృష్ణ పరమహంస, ప్రతినిత్యం తాను భగవంతుడితో మాట్లాడుతున్నానని చెప్పేవారు. నరేంద్రుడు ఆయన దగ్గరకు వెళ్ళి, తన సమస్యలు చెప్పి, తన కష్టాలు తీరేలా జగన్మాతను ప్రార్థించమని అర్థించాడు. రామకృష్ణులు, 'నువ్వే ప్రార్థించు. అమ్మ నీ మొర ఆలకిస్తుంది' అని అన్నారు. నరేంద్రుడు ఆలయానికి వెళ్ళి, కళ్లు మూసుకుని దేవిని ప్రార్థిస్తుంటే, ఆ శక్తి స్వరూపిణి తన కళ్ల ఎదుట ప్రత్యక్షమైన అనుభూతి కలిగింది. ఆ సమయంలో ఆయనకు తన కష్టాలూ, కన్నీళ్లూ గుర్తుకు రాలేదు. ఆ తల్లిని భక్తి, జ్ఞాన, వైరాగ్యాలు ప్రసాదించమని కోరుకున్నాడు. దేవి అంతర్ధానమయ్యాక, మళ్ళీ ప్రాపంచిక విషయాలు గుర్తుకు వచ్చాయి. తన కోరిక చెప్పుకోలేకపోయానని బాధపడ్డాడు. ఇలా మూడుసార్లు జరిగింది. సమస్యలూ, కష్టాలూ, సంక్షోభాలూ, అందరి జీవితాల్లోనూ ఉంటాయి. ఎవరికి వారే, వాటిని పరిష్కరించుకోవాలి. అందుకు అవసరమైన శక్తిని ఇవ్వమని మాత్రమే, భగవంతుని ప్రార్థించాలి.

ప్రార్థనలో హృదయశుద్దీ, భగవద్విశ్వాసం ముఖ్యం. నమ్మకం లేనప్పుడు, ప్రార్థన సాధ్యం కాదు. సర్వాంతర్యామి మనముందు నిలబడి, మనం చెప్పేది శ్రద్ధగా వింటున్నట్లు, నమ్మాలి. దైవాన్ని నిరాకారుడిగానూ, నిర్గుణుడిగా కూడా ప్రార్థించవచ్చు. దైవాన్నే గాక, త్రిమూర్త్యాత్మకుడైన సద్గురువునూ ప్రార్థించవచ్చు. ప్రార్థన వల్ల అజ్ఞానికి జ్ఞానం, పిరికివాడికి ధైర్యం, కష్టాల్లో ఉన్నవాడికి ఓదార్పూ లభిస్తాయి. ప్రార్థనవల్ల, మనలోని అహంకారం నశిస్తుంది, సాత్వికత పెంపొందుతుంది, ఆత్మబలం ఇనుమడిస్తుంది, మనసు ప్రక్షాళనమవుతుంది, ఆధ్యాత్మిక శక్తి పెరుగుతుంది, శాంతి సహనాలు వృద్ధి చెందుతాయి. ప్రార్థించే సాధకుడికి ప్రశాంత జీవనశైలి అవసరం. ప్రార్థన మన జీవన విధానంలో మార్పును తీసుకువస్తుంది. ప్రార్థించేవారికి, శరణాగతి ముఖ్యం. ధర్మవిరుద్ధమైన, న్యాయ ప్రతికూలమైన ప్రార్థనలు ఎన్నటికీ ఫలించవు. సాధకుడికి ధార్మిక వర్తనం ముఖ్యం. యోగ్యమైన ప్రార్థన, ఎన్నటికీ వ్యర్థం కాదు.

వ్యక్తిగత క్షేమం గురించి కాక, రుషులూ, మహనీయులూ, లోక కల్యాణం కోసం ప్రార్థించారు. సకల జనులకూ శుభం కలగాలనీ, అన్ని లోకాలూ క్షేమంగా ఉండాలనీ ప్రార్థించారు. సగుణారాధన విశ్వసించని బ్రహ్మసమాజం వంటి సంస్థల్లో, ప్రార్థనకు అత్యంత ప్రాముఖ్యత ఉంది. మనమూ, నిర్భాగ్యుల కోసం, బలహీనుల కోసం ప్రార్థించాలి! పరుల సుఖాలనే మన సుఖమనీ, విశ్వశ్రేయస్సే మనకూ శ్రేయోదాయకమనీ, బుద్ధిగా జీవించాలనీ, త్రికరణ శుద్ధితో ఆ పరమాత్మకు చేసే విన్నపమే, 'ప్రార్థన!'.

భగవంతుడు మనిషికి అన్నీ ఇచ్చాడు. అయినా, ఏదో తెలియని ఆరాటం, గుండెల్లో ఆరడి చేస్తూనే ఉంటుంది. అందుకు కారణం, ఏదో ఒకమూల స్వార్థ పిశాచం పట్టి పీడిస్తూ ఉండడం వల్లే, అలా మనస్సు ఊగిసలాడుతూ ఉంటుంది. మనం చేయవలసినదేదో, శక్తివంచన లేకుండా, సక్రమంగా చేస్తే చాలు. తక్కినదంతా, ఆ పరమాత్ముడే చూసుకుంటాడు. ఆ మాట గీతాచార్యుడు చాలా స్పష్టంగానే వ్యక్తపరిచారు. అయినా, 'అజ్ఞానం, అహంకారం, మమకారం' అనే ఈ మూడూ ఏకమై, మనలను పెడదారికి ఈడుస్తూ ఉంటాయి. అలా జరగకుండా, మనస్సును నిర్మలంగా ఉంచమనీ, ప్రపంచాన్ని ప్రేమగా చూడగల హృదయ సౌందర్యాన్ని ప్రసాదించమనీ, పరోపకారం వైపు బుద్ధిని మరల్చమనీ, మాటలకందని మౌనభాషలో భగవంతుణ్ని వేడుకోవడమే, నిజమైన 'ప్రార్థన!'. ఆ ప్రార్థన సన్నని వెలుగై, మన జీవితాలను గమ్యంవైపు నడిపిస్తుంది. ‘సర్వేజనాః సుఖినోభవంతు, లోకాః సమస్తాః సుఖినోభవంతు’ అనే ఒక గొప్ప ప్రార్థనను, వేదం ప్రపంచానికి అందించింది. అదే మన జీవితాలకో దారి దీపమై, వెలుగును చూపాలని అర్థించాలి. 'అందరూ బాగుండాలి.. అందులో మనమూ ఉండాలి' అనే భావనతో, జీవనం కొనసాగించాలి. అదే మనం చేయవలసిన 'ప్రార్థన'!

కృష్ణం వందే జగద్గురుం!

[ మంచిమాట వీడియోలు: https://www.youtube.com/playlist?list=PLNoNQLGbZ7gbq-DusM1YjHrgyBxuhCXRi ]

Link: https://www.youtube.com/post/UgkxzauIt-imaloF5GDQDjs2Nzrlf7N9uuXK

అమృత హస్తం! - Amruta Hastam

అమృత హస్తం!

ఎవరి జీవితంలోకి తొంగి చూసినా, సుఖ దుఃఖాలు ఒకే స్థాయిలో ఉంటాయి. కాకపోతే, ఎంత చెట్టుకంత గాలి అన్నట్లుగా ఉంటుంది. ఈ ప్రపంచంలో, మన కష్టాన్ని గురించి శ్రద్ధగా, సానుభూతిగా వినే ఒక్కరైనా లేక పోవడం, అన్నింటికన్నా పెద్ద దురదృష్టం. మన సంతోషాన్ని పంచుకునే వారుంటారు. కానీ, మన కష్టాన్ని పంచుకోవడానికీ, కన్నీళ్లను తుడిచి పోవడానికీ, ఎవరు ముందుకొస్తారు?

[ ఈ వ్యాసాన్ని వీడియోగా చూడండి: https://youtu.be/RZ2Q8KqiXYc ]

మనం నవ్వుల్ని తోటివారితో, ప్రకృతితో పంచుకుంటాం. కానీ, మన కన్నీటిని ఎవరు పంచుకుంటారు? దాన్ని పంచుకోవాలంటే, అవతలి మనిషికి మధుర హృదయం ఉండాలి. మానవీయ కోణం ఉండాలి. తన హృదయపు పొరల పూలరేకులతో, అవతలి వారి గాయపడిన గుండెను పదిలంగా పొదువుకుని, గాయాల మరకలను తుడిచి, మాధుర్యపు మందులను వేసి, చిరునవ్వుల మృదుగానంతో సేద తీర్చే ఔషధీయ హృదయం ఉండాలి. ఈ వైద్యానికి ఔషధం అవసరం లేదు. ధనం అగత్యం లేదు. మంచి మనసు ఉండాలి. అవతలి వారి గాయాన్ని తనదిగా భావించే, స్పందించే మనసు ఉండాలి.

అలాంటి ఒకరు మనకుంటే, మన కన్నీరు పన్నీరు అవుతుంది. కష్టం కూడా ఇష్టంగా మారుతుంది. శ్రీకృష్ణుడి స్నేహితులకు కష్టం లేకపోలేదు, కన్నీరు రాకపోలేదు. నిజానికవన్నీ వాళ్లకు ఎక్కువ. కానీ, అంత ప్రియమైన స్నేహితుడున్నాక, అంత మృదువుగా కన్నీరు తుడిచే సహచరుడున్నాక, అంతగా కష్టం పంచుకునే ఆత్మీయుడు మనకంటూ ఉన్నాక, కన్నీరు కాటు వేయగలదా? కష్టం వేటు వేయగలదా? కారు మేఘం కూడా మధురమైన నాట్యం చేయదా? స్నేహాన్ని వెన్నలా పంచుకు తిన్న శ్రీకృష్ణుడు, అటుకుల్ని అమృతంలా ఆరగించిన శ్రీకృష్ణుడు, స్నేహితులు, సన్నిహితులు, సహచరుల దుఃఖ భాష్పాల్ని ఆనంద భాష్పాలుగా మార్చకుండా వదులుతాడా, వదలగలడా? పెనుతుపానును గోవర్ధన గిరి క్రింద ఆటవిడుపు విహారంగా మలచకుండా ఉంటాడా? రహస్యం కళ్లలో, కన్నీళ్లలో లేదు. వాటిని తుడిచే ఆ అమృత హస్తంలో ఉంది. కష్టంలో, దాని పరిణామాల్లో లేదు. వాటిని కమనీయంగా మలచే ఆ హృదయపు సొంపులో ఉంది. 

శిల ఏదైనా శిలే. దాన్ని శిల్పంగా మలచే నేర్పు, శిల్పిలో ఉండాలి. పాపాయిగానో, యువతిగానో, రాజుగానో, సర్పంగానో, సర్వేశ్వరుడిగానో.. అదంతా శిల్పి నేర్పు, ఓర్పు. మన కన్నీళ్లకు అర్థాన్ని మార్చే నేర్పు, వాటిని తుడిచే వాళ్లకుండాలి. ఏది ఏమైనా, కన్నీళ్లకు, తుడిచే ఒక అమృత హస్తం కావాలి. నీకు నేనున్నానంటూ, ఆ కన్నీళ్లను అమృత బిందువులుగా మార్చే కమనీయ హృదయం కావాలి.

ఆ హస్తం మనదే అయితే.. అలాంటి హృదయం మనకే ఉంటే.. మనమే ఆ శ్రీకృష్ణుడైతే? మన ఇంటికప్పు గోవర్ధనగిరిగా మారదా? మారుతుంది! ఎవరికి ఏం సహాయం చేయాలన్నా, మనకు ధనం అవసరం లేదు, బలం అవసరం లేదు. 'మనం', ప్రేమించే హృదయం అయిపోవాలి. మన వేళ్లు కన్నీళ్లను తుడిచే తామర రేకులుగా మారాలి. మాటలు మకరందపు బిందువులుగా జాలువారాలి. లోకంలో ఏ ఒక్కరికైనా, నీకు నేనున్నానంటూ నిలబడగలిగితే, లోకమే తోడుగా మన పక్కన నిలబడదా? మన వెనుక నడచి రాదా? ఒక్కరు కోటి మందిగా మనకు గొడుగు పట్టరా?

'ప్రేమంటే' హృదయానికి ప్రణమిల్లని మనిషి ఉండడు. కన్నీరు తుడిచే చేతికి అంత విలువ ఉంది, అంత శక్తి ఉంది. మనమూ, ఆ ‘ఒక్కరం’ అవుదాం. కన్నీరు తుడుద్దాం. కన్నీరు కార్చేవారు, లక్షల మంది ఉంటారు. కానీ, ఆ కన్నీళ్లను తుడిచే చేతులు, కోటిలో ఒకరికే ఉంటాయి. శ్రీకృష్ణుడు, జీవితమంతా కష్టాలూ ఎదురు దెబ్బలతో సహవాసం చేసినా, ఏ ఒక్కరోజూ, ఆ భావంతో బాధ పడిన దాఖలాల్లేవు. ఎవరి సహాయాన్నీ, సానుభూతినీ కోరిన రుజువుల్లేవు. ఎందుకంటే, ఇతరుల కన్నీటిని తుడవడంలోని సాటిలేని ఆనందాన్ని తెలిసిన ‘శ్రీ కృష్ణుడు’ ఆయన. సకల జీవరాశి కష్టాలనూ ఎరిగిన వెన్నదొంగ ఆయన! కృష్ణం వందే జగద్గురుం!

Manchimata Videos:

[ పరిపూర్ణ జీవితం! = ఈ వీడియో చూడండి: https://youtu.be/yt7pEUOPVcw ]

[ మనిషికుండవలసిన లక్ష్యం! = ఈ వీడియో చూడండి: https://youtu.be/laB5lI-sf2Q ]

[ మనిషికుండే నిరాశ! = ఈ వీడియో చూడండి: https://youtu.be/XGKkJQEPLHU ]

[ నిజమైన సంపద! = ఈ వీడియో చూడండి: https://youtu.be/sX5tx83D7Ww ]

[ కదిలిపోయేదే కాలం! = ఈ వీడియో చూడండి: https://youtu.be/9kQuLJAe4-A ]

[ నవరసభరితం - నరుడి జీవితం! = ఈ వీడియో చూడండి: https://youtu.be/HKkTaHJflj8 ]

[ జీవితం అంటే..! = ఈ వీడియో చూడండి: https://youtu.be/L6oFrjCLTJM ]

[ అహం! = ఈ వీడియో చూడండి: https://youtu.be/nhLpOnRzktw ]

[ ఏది దారి? = ఈ వీడియో చూడండి: https://youtu.be/3k6gzpMZ2kw ]

[ జీవితమే ఒక పరీక్ష! = ఈ వీడియో చూడండి: https://youtu.be/GaDOxcDxuLo ]

[ జీవితంలో చీకటి వెలుగులు! = ఈ వీడియో చూడండి: https://youtu.be/G-5sb0SbNk8 ]

[ నిత్యం నేర్చుకునే వాడే ఇతరులకు నేర్పగలడు! = ఈ వీడియో చూడండి: https://youtu.be/JFLTERF-L2w ]

[ మనిషి జయించవలసిన '6 దోషాలు' – విదుర నీతి! = ఈ వీడియో చూడండి: https://youtu.be/vu76U3f7LJ4 ]